თქვენი givve®‑ს საგადახდო ბარათი

givve®‑ს საგადახდო ბარათის გამოყენებამდე დაგჭირდებათ მისი გააქტიურება. ბარათის მიღებისას მას დართული ექნება კომპეტენტური სააგენტოს მიერ მომზადებული პერსონალური წერილი, რომელიც უნდა შეინახოთ, საგადახდო ბარათი რომ გაააქტიუროთ. წერილის მიღების შემდეგ givve®‑ს საგადახდო ბარათის გააქტიურების ინსტრუქციას აქ გაეცნობით.

ფულად დახმარებას ნაღდი ფულის ან ყოველთვიური ჩარიცხვის სახით აღარ მიიღებთ.
ამის ნაცვლად გადმოგეცემათ საგადახდო ბარათი, რომელიც ყოველთვიურად შეივსება ფულადი სახსრებით. givve®‑ს საგადახდო ბარათი წარმოადგენს სადებეტო Mastercard‑ბარათს, რომლის გამოყენებაც შესაძლებელია კონკრეტულ რეგიონში ანგარიშსწორებისთვის, სტანდარტული საბანკო ბარათის მსგავსად.

givve®‑ს საგადახდო ბარათის გამოყენება შესაძლებელია ყველგან, სადაც იღებენ Mastercard‑ბარათებს, თქვენთვის განსაზღვრული რეგიონის ფარგლებში. ყურადღება მიაქციეთ Mastercard®‑ის ნარინჯისფერ-წითელ ნიშანს.

თქვენი ბარათისთვის განსაზღვრული რეგიონი მითითებული იქნება givve® Card‑ის აპისა და givve®‑ს ვებპორტალის სექციაში „თქვენი რეგიონი“.

თქვენი ბარათით თანხის გამოტანის შესაძლებლობისა და შესაბამისი მდებარეობების გარკვევა შეგიძლიათ როგორც givve® Card‑ის აპის, ისე givve®‑ს ვებპორტალის მეშვეობით. თანხის გამოტანის კუთხით გასათვალისწინებელია, რომ ზოგიერთ შემთხვევაში აღნიშნული შესაძლებელია ბანკომატების მეშვეობით, ზოგჯერ კი — POS‑ტერმინალების გამოყენებით. 

თუ თქვენი საგადახდო ბარათისთვის დაშვებულია ბანკომატების გამოყენება: თუ თქვენი საგადახდო ბარათისთვის გააქტიურებულია თანხის ბანკომატებიდან გამოტანის შესაძლებლობა, აღნიშნულისთვის უნდა ისარგებლოთ შემდეგი ბრენდების ბანკომატებით:

• Deutsche Bank, Commerzbank, HypoVereinsbank და Postbank (Cash Group)
• Targobank AG, Sparda‑Bank და Santander (CashPool)
• Volksbank‑ისა და Raiffeisenbank‑ის განყოფილებები (საბანკო ბარათების მომსახურების ქსელი)
• Sparkasse (შემნახველი ბანკის საფინანსო ჯგუფი)

თუ თქვენი საგადახდო ბარათისთვის დაშვებულია POS‑ტერმინალების გამოყენება: თუ თქვენი საგადახდო ბარათისთვის გააქტიურებულია თანხის POS‑ტერმინალების საშუალებით გამოტანის შესაძლებლობა, აღნიშნულისთვის უნდა ისარგებლოთ შემდეგი ბრენდების POS‑ტერმინალებით:

• Rossmann
• ALDI Süd
• dm‑drogerie
• Globus
• Netto Marken‑Discount (ყვითელი  Netto)
• MARKANT
• famila
• NORMA 

გაითვალისწინეთ, რომ მაღაზიებში თანხის გამოტანა უფასოა, ბანკომატებიდან თანხის გამოტანის შემთხვევაში კი, შესაძლოა, მოქმედებდეს გადასახადი, რომელიც გამოტანილ თანხას დაემატება. 

თუ თქვენი givve®‑ს საგადახდო ბარათი მოგპარეს ან დაკარგეთ, შეძლებისდაგვარად მალე დაბლოკეთ ის. ამ კუთხით სხვადასხვა უფასო ვარიანტი გაქვთ:

• ბარათის დაბლოკვა ნებისმიერ დროს შეგიძლიათ დამოუკიდებლად, givve® Card‑ის აპის „ბარათის დაბლოკვის“ სექციიდან ან givve®‑ს ვებპორტალის მთავარი გვერდიდანვე. თუ ბარათს იპოვით, მის განბლოკვასაც ნებისმიერ დროს შეძლებთ დამოუკიდებლად იმავე სექციებიდან.
• ბარათის დაბლოკვა სააგენტოსაც შეუძლია. ესეც ნებისმიერ დროს არის შესაძლებელი.
• დაუკავშირდით დაბლოკვისთვის განკუთვნილ ცხელ ხაზს (ენები: გერმანული და ინგლისური). ცხელი ხაზის ნომერია 116 116. ის ხელმისაწვდომია კვირაში 7 დღე, 24 საათის განმავლობაში.

ბარათის დაბლოკვა ავტომატურად არ ნიშნავს, რომ მოთხოვნილი იქნება ბარათის ჩანაცვლება. თუ ბარათის ჩანაცვლება გსურთ, მიმართეთ უშუალოდ სააგენტოს.

თუ givve®‑ს საგადახდო ბარათი დაგებლოკათ, როგორც წესი, შესაძლებელი იქნება მისი ხელახლა განბლოკვა. მოქმედების პრინციპი დამოკიდებულია ბარათის დაბლოკვის მიზეზზე:

• თუ ის თავად დაბლოკეთ: თუ ბარათი თავად დაბლოკეთ givve® Card‑ის აპის ან givve®‑ს ვებპორტალის მეშვეობით, იმავე ადგილიდანვე შეძლებთ მის მარტივად განბლოკვას.
• თუ ის დაიბლოკა არასწორი PIN‑კოდის რამდენჯერმე შეყვანის გამო: გადახდისას არასწორი PIN‑კოდის 3‑ჯერ მითითების შემთხვევაში თქვენი givve®‑ს საგადახდო ბარათი და PIN‑კოდი ავტომატურად დაიბლოკება. ამ შემთხვევაში, პირველ რიგში, საჭიროა PIN‑კოდის განბლოკვა givve® Card‑ის აპის ან givve®‑ს ვებპორტალის მეშვეობით, სექციაში „PIN‑კოდის მართვა“ > „PIN‑კოდის განბლოკვა“. ამის შემდეგ დაგჭირდებათ ბარათის ჩასმა ნებისმიერ ბანკომატში, რომ წამოიწყოთ თანხის გამოტანის ოპერაცია, რომლის დროსაც PIN‑კოდს მიუთითებთ. აღნიშნული ვრცელდება იმ შემთხვევებზეც, როცა თქვენი ბარათისთვის რეალურად არ არის გააქტიურებული ბანკომატებიდან თანხის გამოტანის შესაძლებლობა. ყოველივე ეს საჭიროა მხოლოდ PIN‑კოდის განსაბლოკად — თანხის გამოტანა არ მოგიწევთ. ამას გარდა, აღნიშნული პროცედურის გავლა გჭირდებათ იმ შემთხვევაშიც, თუ ბარათზე თანხა აღარ დაგრჩათ, ან თანხის გამოტანის ლიმიტს უკვე მიაღწიეთ. შესაძლოა, ბანკომატმა გაუწყოთ, რომ თანხის გამოტანა შეუძლებელია. ამის მიუხედავად, ბარათის სრულად განსაბლოკად საკმარისია ბანკომატში PIN‑კოდის შეყვანა, რის შემდეგაც კვლავ შეძლებთ ბარათით ანგარიშსწორებას (თუ, რა თქმა უნდა, მასზე არის თანხა).
• თუ ის სააგენტომ დაბლოკა: თუ ბარათი თქვენმა სააგენტომ დაბლოკა, მის განსაბლოკად მიმართეთ სააგენტოს.

ამას გარდა, გაეცანით დეტალურ მითითებებს givve® Card‑ის აპისა და ვებპორტალის გამოყენებასთან დაკავშირებით. 

აპის ენის დაყენება შეგიძლიათ აპის ინსტალაციის ან სისტემაში პირველი შესვლის დროს. შესაძლებელია მისი მოგვიანებით შეცვლაც მომხმარებლის პარამეტრებიდან (person icon) ზედა მარჯვენა ნაწილში. ენის მიმდინარე პარამეტრები მოცემული იქნება პარამეტრების მენიუს ქვედა ნაწილში. ენაზე დაწკაპუნებით ყველა ხელმისაწვდომი ენა გამოჩნდება, რის შემდეგაც სასურველი ენის არჩევას შეძლებთ.

სატელეფონო მხარდაჭერის მისაღებად დაუკავშირდით givve®‑ს მომხმარებელთა მომსახურების სამსახურს ტელეფონის შემდეგ ნომრებზე: +49 89 6606261500 ან +49 89 21537890

დაბლოკვისთვის განკუთვნილ ცხელ ხაზთან დაკავშირება ნებისმიერ დროს შეგიძლიათ ტელეფონის შემდეგ ნომერზე დარეკვით: 116 116 (ენები: გერმანული და ინგლისური).